பாகிஸ்தானுக்கு எதிரான மூன்று போட்டிகள் கொண்ட டி20 சர்வதேசத் தொடரில் ஏற்கனவே முதல் இரண்டு போட்டிகளிலும் தோல்வியடைந்துள்ள இலங்கை அணி, தொடரை முழுமையாக இழப்பதைத் தவிர்க்கும் நோக்கில் மூன்றாவது போட்டியில் களமிறங்கவுள்ளது. மறுபுறம், தொடரை 2-0 எனக் கைப்பற்றியுள்ள பாகிஸ்தான் அணி, சொந்த மண்ணில் ஆதிக்கத்தைத் தொடர்ந்து தக்கவைக்கத் தயாராக உள்ளது.

தொடர்ச்சியான தோல்விகளால் தடுமாறும் இலங்கை!

2026 டி20 உலகக் கிண்ணத்தில் அவுஸ்திரேலியாவுக்கு எதிராக வெற்றி பெற்ற பின்னர், இலங்கை அணி டி20 சர்வதேசப் போட்டிகளில் கடுமையான பின்னடைவைச் சந்தித்து வருகிறது. ஆசிய விளையாட்டுப் போட்டிகளில் பங்களாதேஷுக்கு எதிராகப் பெற்ற வெற்றியையும் கணக்கில் எடுத்துக்கொண்டால், அந்த வெற்றிக்குப் பின்னர் இலங்கை அணி 12 தோல்விகளைச் சந்தித்துள்ளதுடன், இரண்டு வெற்றிகளை மட்டுமே பெற்றுள்ளது.

இந்தக் காலப்பகுதியில் அணித்தலைமை மாற்றங்கள், புதிய தலைமைப் பயிற்சியாளர் நியமனம் மற்றும் பல்வேறு துடுப்பாட்ட வரிசை முயற்சிகள் மேற்கொள்ளப்பட்டுள்ளன. இருப்பினும், அணியின் ஆட்டத்தில் எதிர்பார்த்த முன்னேற்றம் இன்னும் ஏற்படவில்லை.

பந்துவீச்சில் முன்னேற்றம் காண வேண்டிய இலங்கை!

இரண்டாவது டி20 போட்டியில் இலங்கை அணியின் சுழற்பந்து வீச்சாளர் மகீஷ் தீக்ஷனாவின் பந்துவீச்சை பாகிஸ்தான் துடுப்பாட்ட வீரர்கள் சிறப்பாக எதிர்கொண்டனர். அதேபோன்று, வேகப்பந்து வீச்சாளர்களாலும் பாகிஸ்தான் துடுப்பாட்ட வரிசைக்கு போதிய அழுத்தத்தை ஏற்படுத்த முடியவில்லை.

ராவல்பிண்டி மைதானத்தின் துடுப்பாட்டத்துக்கு சாதகமான ஆடுகளத்தில் பாகிஸ்தான் வீரர்கள் சுதந்திரமாக ரன்களைக் குவித்தனர். மூன்றாவது போட்டியிலும் பந்துவீச்சாளர்களுக்குச் சாதகமான சூழல் அதிகமாக இருக்காது என்பதால், இலங்கை அணி தனது பந்துவீச்சு வியூகத்தில் மாற்றங்களைக் கொண்டுவர வேண்டிய நிலை ஏற்பட்டுள்ளது.

தலைமைப் பயிற்சியாளர் கேரி கேர்ஸ்டன் மற்றும் புதிய அணித்தலைவர் குசல் மெண்டிஸ் ஆகியோர் இன்னும் சிறந்த அணிக்கட்டமைப்பை உருவாக்க முயற்சித்து வருகின்றனர். இதனால், மூன்றாவது போட்டியிலும் இலங்கை அணியின் வீரர்கள் மற்றும் துடுப்பாட்ட வரிசையில் மாற்றங்கள் இடம்பெற வாய்ப்புள்ளது.

தொடரைக் கைப்பற்றிய பாகிஸ்தான் – வீரர்களுக்கு ஓய்வு வழங்கப்படுமா?

பாகிஸ்தான் அணி ஏற்கனவே தொடரை 2-0 எனக் கைப்பற்றியுள்ளதால், முக்கிய வீரர்களுக்கு ஓய்வு வழங்கும் வாய்ப்பு காணப்படுகிறது. எனினும், ஒருநாள் மற்றும் டி20 கிரிக்கெட்டில் அண்மைக் காலமாகத் தடுமாறி வரும் பாகிஸ்தான் அணிக்கு, இந்தத் தொடரில் துடுப்பாட்ட வீரர்கள் தொடர்ந்து சிறப்பாகச் செயல்படுவது நம்பிக்கையளிக்கும் விடயமாக அமைந்துள்ளது.

இதனால், சிறப்பாக விளையாடி வரும் துடுப்பாட்டக் கூட்டணியை மாற்றாமல் தொடர்வதற்கும் அணி நிர்வாகம் விரும்பலாம்.

இலங்கை அணியின் பந்துவீச்சாளர்கள் இம்முறை பாகிஸ்தானின் ஆரம்பத் துடுப்பாட்ட வரிசையை வீழ்த்தினாலும், அதன் மத்திய வரிசை வீரர்களையும் கட்டுப்படுத்த வேண்டிய சவால் காத்திருக்கிறது.

ஒயிட்வாஷைத் தவிர்க்குமா இலங்கை?

தொடர்ச்சியான தோல்விகளால் நம்பிக்கையை இழந்துள்ள இலங்கை அணிக்கு, மூன்றாவது டி20 போட்டி வெற்றியைப் பதிவு செய்வதற்கான முக்கிய வாய்ப்பாகும். பந்துவீச்சில் கட்டுப்பாட்டை அதிகரித்து, துடுப்பாட்டத்தில் பொறுப்புடன் செயல்பட்டால் மட்டுமே பாகிஸ்தானின் ஆதிக்கத்துக்கு முற்றுப்புள்ளி வைக்க முடியும்.

தொடரை ஏற்கனவே இழந்துள்ள இலங்கை அணி, கடைசிப் போட்டியில் வெற்றி பெற்று ஒயிட்வாஷைத் தவிர்க்குமா என்பதே ரசிகர்களின் எதிர்பார்ப்பாக உள்ளது.